Geguritan Dening Dr. KRT. Akhir Lusono, SSn, MM  #4

Geguritan Dening Dr.KRT. Akhir Lusono, SSn, MM  #4

*******●●●●●●*******

Duwe Yoga

Aja nganti yen peputra duwe yoga sing sinebut generasi strawbari
Awit senajan njaban ayu ganteng utawa endah
Nanging isine mlenyek
Pindhane telek
Mula duwe putra kudu ginodhog ing kawah Candradimuka
Dibakar diuleni diseneni digladhi pencak
Dimen dadi bocah kang bakoh
Dadi pawongan sing pengkuh
Ora memble lan leda lede
Bocah saiki kudune tansaya kuat
Amarga mungsuhe saya abot
Mula duwe atmaja aja tansah diuja

*******●●●●●●*******

 

Pangarsa

Ing ngarep kuwi papane
Nanging uga ing tengah panggonane
Kalamangsa uga ing mburi
Mula ana unen unen
Ing ngarsa sung tulada
Ing madya mangun karsa
Tut wuri handayani
Awit jejere pangarsa kudu bisa manjing ajur ajer
Hangentasi karya
Hangemong
Hangayomi
Hamemayoni
Tansah sigra magita gita
Cancut taliwanda
Gya siyaga

*******●●●●●●*******

 

Adhem

Hawane atis
Adem njekut swasana mendhung
Udane riwis riwis
Arep budhal mergawe sajak aras arasen
Kaya kaya bokok abot ninggalake kursi Utawa amben
Senajan mangkono badan kudu digenahke
Pikiran kudu diprenahke
Dimen sengkut nyambut gawe
Senajan hawane adhem
Ananging urip kudu terus anget kepara panas
Dimen pendhane mesin
Ora maelu lagi bar di uripke Utawa wis suwe.

Cebongan, Kasihan 24 Januari 2025